Türkmenistandan 16 ýaşly dzýudoçy Oguljan Ruslanowa Germaniýada geçirilen Ýewropa Kubogy ugrundaky ýaryşda (Berlin Millennium Team Cadet European Cup 2025) bürünç medal gazandy.
Berlinde geçirilen ýaryşa 70 kilograma çenli agram derejesinde 16 ýurtdan 39 türgen gatnaşdy. Oguljan ýaryş ýolunda bäş ýeňiş gazandy. Birinji aýlawda Sweni Kedingi (Germaniýa), soňra Leni Welteri (Lýuksemburg), Alesýa Winselowinsy (Latwiýa) we Lara Katarina Malçagy (Germaniýa) ýeňdi, ýarym finalda O.Ruslanowa fransiýaly Aleksandra Žoffruadan asgyn geldi we 3-nji ýer ugrundaky göreşde Wiktoriýa Ýursikowany (Çehiýa) ýeňip, münberiň üçünji basgançagyna çykdy. Ýene bir bürünç medala Gülsezim Turlybek (Gazagystan) eýe boldy. Kümüş medaly Aleksandra Žoffrua (Fransiýa) eýeledi. Jorjiýa Grassi (Italiýa) ýaryşda ýeňiş gazandy.
Oguljan Ruslanowa Lebap welaýatynyň Çärjew etrabyndaky 61-nji orta mekdebiniň 11-nji synp okuwçysy. Bu Lebap welaýatyndan zehinli ýaş dzýudoçynyň halkara ýaryşyndaky ilkinji üstünligidir. Oguljan Ruslanowa 10 ýaşyndan bäri dzýudo bilen meşgullanýar. Ol sportuň olimpiýa görnüşiniň tilsimlerini Gaýratjan Zarypowdan öwrenip başlady. Häzirki wagtda Aýna Zarypowanyň ýolbaşçylygynda türgenleşýär diýip, "Türkmenistan: Altyn asyr" elektron neşiri habar berýär.
