Tesla-nyň müdirler geňeşi bir aý öň kompaniýanyň baş direktory wezipesinde Ilon Masky çalyşmak barada maslahatlaşyp başlady. Bu barada çeşmelere salgylanyp, The Wall Street Journal habar berýär. Munuň sebäbi kompaniýanyň paýnamalarynyň pese gaçmagy we maýadarlaryň Maskyň Ak tamdaky işlere wagtyny köp sarp etmeginden nägile bolmagy boldy.
Neşiriň söhbetdeşleriniň aýtmagyna görä, müdirler geňeşiniň agzalary täze baş direktory tapmak üçin eýýäm ýörite agentliklere ýüz tutdy. Şol bir wagtyň özünde Maskdan Tesla-nyň işine köp üns bermek we bu barada köpçüligiň öňünde aýtmak soraldy. Çeşmeler Maskyň garşy çykmandygyny habar berýär. Ýöne onuň müdirler geňeşiniň pikirinden we prosesiň nähili dowam edýändiginden habarynyň bardygy ýa-da ýokdugy belli däl.
Tesla-nyň özi täze ýolbaşçynyň gözlenilýändigi baradaky habary ret edip, WSJ-niň maglumatyny “ýalňyş” we “düýbünden ýalan” diýip atlandyrdy. Kompaniýa Maskyň Tesla-ny ösdürip biljekdigine ynanýandygyny belledi. Maskyň özi hem makalany “ýalan”, WSJ neşirini bolsa “žurnalistikanyň abraýyny gaçyrýan” diýip atlandyrdy.
Işewür Tesla-a 2004-nji ýylda esasy maýadar hökmünde goşuldy, soňra kompaniýanyň baş direktory boldy.
2025-nji ýylyň aprel aýynda kompaniýa birinji çärýekde girdejiniň 71% pese gaçyp, 409 mln dollar bolandygyny habar berdi. Tesla satuwyň Maskyň Hökümet netijeliliginiň departamentindäki (DOGE) işinden zyýan çekendigini aýtdy. Hasabat neşir edilenden soň, Mask maý aýyndan Waşingtondaky iş wagtyny azaltjakdygyny, 30-njy maýa çenli bolsa DOGE-yň başlygy wezipesinden gitjekdigini aýtdy.
