116 ýyl 326 gün ýaşynda monah aýal Ina Kanabarro Lukas aradan çykdy – ol dünýäde iň garry adam diýlip hasaplanýardy. Bu barada aýalyň degişli bolan Portu-Alegri şäheriniň dini jemagatyna salgylanyp, AFP habar berýär.
Amerikanyň Gerontologiýa gözlegleri toparynyň (GRG) maglumatlaryna we LongeviQuest maglumatlar bazasyna görä, Lukas aradan çykandan soň dünýäniň iň garry ýaşaýjysy ady Beýik Britaniýanyň Surreý graflygyndan Etel Keýtereme geçdi. Geçen ýylyň awgust aýynda ol 115 ýaşyny doldurdy.
Ina Lukas hormatly ady ýanwar aýynda 116 ýaşly ýaponiýaly Tomiko Itooka aradan çykandan soň aldy.
LongeviQuest 110 ýaşynyň dolan güni monah aýalyň Rim papasy Fransiskden ak pata alandygyny habar berýär. Papa geçen duşenbe güni 89 ýaşynda aradan çykdy we dynç günleri jaýlandy.
GRG-niň başlygy Robert Ýangyň aýtmagyna görä, Lukas öz doglan senesiniň 1908-nji ýylyň 27-nji maýydygyny aýtsa-da, resminamalarda onuň 8-nji iýunda doglandygy görkezilýär. Ina Riu-Grandi-du-Sul ştatynda dünýä indi. Ol general Dewid Kanabarronyň çowlugy, onuň kakasy bolsa 1923-nji ýylda söweşde aradan çykdy. Çagalykda gyzjagazyň gaty horlanandygy sebäpli, onuň ömri uly alada goýupdy.
Ilkibaşda ol internatda okady, soňra 1928-nji ýylda Montewideo göçüp gelip, monah boldy. 1930-njy ýylda Braziliýa dolanyp geldi we Rio-de-Žaneýrodaky bir mekdepde portugal dilinden we matematikadan sapak berdi.
2021-nji ýylda 112 ýaşynda ol koronawirusa garşy ilkinji sanjym dozasyny aldy. 2022-nji ýylyň oktýabrynda COVID-19 bilen keselledi we gutuldy.
