Deadline neşiri öz çeşmelerine salgylanyp, “Dedpul we Rosomaha” filminiň girdejisi we çykdajylary barada çen-takmyn maglumatlary hödürledi. Olardan ugur alsaň, 2024-nji ýylyň iň girdejili filmleriniň biri Marvel studiýasyna, takmynan, 400 mln dollar girdeji getirdi.
2024-nji ýylyň ahyryna çenli maglumatlara görä, umumy girdeji, takmynan, 980 mln dollar boldy. Bu mukdardan 620 mln dollar kinoteatr prokatyndan, 150 mln dollar Blu-ray-daky satuwdan, ýene 210 mln dollar bolsa filmiň onlaýn kinoteatrlarda we telewideniýede görkezilmeginden alyndy.
Film üçin çykdajylar 580 mln dollar boldy. Bu mukdara önümçilik býujeti ($200 mln), marketing ($160 mln), aktýorlaryň we surata düşüriji toparyň zähmet tölegleri ($130 mln), şeýle-de beýleki çykdajylar ($90 mln) girdi.
Şeýlelikde, Marvel-iň arassa girdejisi, takmynan, 400 mln dollar boldy. Bu “Dedpul we Rosomaha” filmini soňky ýyllarda studiýanyň iň girdejili taslamasyna öwürýär.
