Türkmenistanda ýakynda täze nesil SP çalgy ýaglaryny öndürýän kärhana işläp başlady. Ahal welaýatynyň Gökdepe etrabynda ýerleşýän "Täze senagat" açyk görnüşli paýdarlar jemgyýeti bu ugurda ilkinji önümçilik işlerine girişdi. Kärhana häzirkizaman tehnologiýalara esaslanyp, ýokary hilli çalgy ýaglaryny öndürmäge ýöriteleşendir.
Häzirki wagtda ilkinji önümlerini öndürip başlan hususy kompaniýa ýakyn wagtda ýeňil we ýük awtoulaglary, gurluşyk hem-de oba hojalyk tehnikalary, benzinli we dizelli hereketlendirijiler, şeýle hem senagat enjamlary üçin niýetlenen dürli görnüşli çalgy ýaglarynyň önümçiligini has hem giňeltmegi hem-de olary sarp edijilere ýetirmegi meýilleşdirýär.
Önümçilikde ulanylýan esaslyk ýaglar “Türkmennebit” döwlet konserniniň Türkmenbaşydaky nebiti gaýtadan işleýän zawodlar toplumyndan alynýar. Goşundylar we funksional garyndylar bolsa ABŞ-nyň we Beýik Britaniýanyň bu ugurdaky öňdebaryjy dünýä belli kompaniýalary tarapyndan üpjün edilýär. Olaryň arasynda esasy hyzmatdaş “Infineum” kompaniýasydyr. “Infineum” dünýäniň iri kompaniýalary bolan “ExxonMobil” (ABŞ) we “Royal Dutch Shell” (Beýik Britaniýa) tarapyndan bilelikde eýeçilik edilýän öňdebaryjy tehnologiýa üpjünçisidir. Bu hyzmatdaşlygyň netijesinde öndürilýän çalgy ýaglar halkara derejede bäsdeşlige ukyplylyk gazanýarlar.
Amerikanyň Nebit instituty (API) tarapyndan 2020-nji ýylyň maý aýynda kabul edilen SP çalgy ýaglary kategoriýasynyň formulalary esasynda taýýarlanylýan bu ýaglar ýokary wiskozlyk durnuklylygy, ýangyjyň tygşytlanmagy, ýokary temperatura garşy çydamlylyk hem-de hereketlendirijiniň arassalygyny saklamak ýaly aýratynlyklary özünde jemleýär. Şeýle aýratynlyklar ýagyň kemelmegine garşy täsir edip, hereketlendirijiniň ömrüni uzaltmaga ýardam berýär.
Daşary ýurtlara hem eksport edilmegi meýilleşdirilýän bu ýaglar "Greenhill" haryt nyşany bilen öndürilýär. Esasan ýerli çig mallaryň ulanylmagy we ýerli önümçilik bu ýaglaryň bahalarynyň amatly bolmagyny üpjün edýär. Döwrebap tehnologiýalar we täze nesil formulalar esasynda taýýarlanylýan çalgy ýaglary ekologiýa ölçeglerine doly laýyk gelýär.
