Nottingem uniwersitetiniň alymlary howply bakteriýalary ýok edip bilýän täsin antimikrob boýagyny işläp düzdüler. Öňki kümüş ýa-da mis düzümli örtüklerden tapawutlylykda, täze formulanyň düzüminde diglýukonat hlorgeksidin (CHX) bar – ol mikroblary we ştammlary tiz ýok etmek üçin güýçli biologik serişdedir. Bu barada «New Atlas» neşiri habar berýär.
Geçirilen synaglarda boýag altynsow stafilokoklary, içege taýajyklaryny we gök iriňli taýajyklary ýüzüne düşenden soň 18 sagadyň dowamynda ýok etdi. CHX işjeň kislorod görnüşlerini döretmek arkaly, bakteriýalaryň öýjük membranalaryny bozýar.
Bu tehnologiýa Indestructible Paint kompaniýasy bilen hyzmatdaşlykda döredildi we gapy tutawaçlarynda, germewlerde hem-de başga-da köp üstlerde ulanylyp bilner. Örtük açyk reňkde galýar, çyzylma garşy çydamly we daşky gurşawa zyýanly maddalary bölüp çykarmaýar.
Bu aýratyn-da immuniteti pes bolan näsaglar üçin örän wajypdyr, sebäbi olar üçin adaty bakteriýanyň özi hem ölüm howpuny döredip biler. Alymlaryň bellemegine görä, adaty metal örtükler, köplenç, gymmat we netijeliligi boýunça-da pes bolýar.
