Village Roadshow Entertainment Group-yň filmler ýygyndysy satuwa çykarylar. Çözgüt Golliwudyň meşhur studiýasynyň bankrot bolmagynyň çäklerinde kabul edildi diýip, The Hollywood Reporter habar berýär.
Aktiwleriň bahasy 417,5 mln dollar bilen bahalandyrylýar. Bankrotlyk işleri boýunça federal kazyýet Tomas Horan Alcon Media Group-yň teklibini tassyklady. Şertnama 108 çeper filmi, “Matrisa” we “Ouşeniň on bir dosty” ýaly franşizalarda paýlary, studiýa işewürligini we intellektual eýeçilik üçin hukuklary öz içine alýar. Bu aktiwler alyja bu franşizalaryň esasynda täze taslamalary döretmäge mümkinçilik berýär.
Mart aýynda Village Roadshow 11-nji bap boýunça bankrotlykdan goramak barada arza berdi. Munuň sebäbi öz kontentini döretmek üçin gymmat maýa goýumlaryň gönükdirilmegi, şeýle-de Warner Bros bilen köpýyllyk hyzmatdaşlygyň bes edilmegi boldy.
Kynçylyklara garamazdan, studiýanyň ýygyndysy häzirem ýylda 50 mln dollar töweregi girdeji getirýär.
Indi kazyýet aktiwler üçin iň ýokary bahalary gazanmak üçin auksionyň geçirilişine gözegçilik eder. Arza tabşyrmagyň soňky möhleti – 2025-nji ýylyň 16-njy maýy. Has amatly teklipler gelen ýagdaýynda, gyzyklanýan taraplaryň arasynda söwda çekişmesi geçirilip bilner.
