24-nji aprelde ABŞ-nyň Kaliforniýa ştatynyň gubernatory Gewin Nýusom Halkara pul gaznasynyň (IMF) 2024-nji ýyl boýunça maglumatlaryna görä, Kaliforniýanyň nomininal jemi içerki önüminiň (JIÖ-niň) 4,1 trln dollara ýetendigini aýtdy. Munuň netijesinde, ştat ykdysadyýetiniň ululygy boýunça Ýaponiýany (4,02 trln dollar) geçdi we ABŞ-dan, Hytaýdan we Germaniýadan soň dünýäde dördünji orny eýeledi.
Şol bir wagtyň özünde, ştatyň gubernatory häzirki ösüş dinamikasyndan çen tutsaň, Hindistanyň JIÖ-niň 2026-njy ýylda hem Kaliforniýadan hem-de Ýaponiýadan öňe geçip biljekdigini belläp geçdi. 2024-nji ýylyň jemlerine görä, Hindistanyň nomininal JIÖ-i 3,9 trln dollara deň boldy.
Häzirki wagtda Kaliforniýada, takmynan, 40 million adam ýaşaýar. Şeýlelikde, ol ABŞ-nyň iň köp ilatly ştaty bolup durýar we ýurduň umumy ilatynyň 12%-ini özünde jemleýär. Ştatyň JIÖ-i ABŞ-nyň umumy ykdysadyýetiniň 14%-ini düzýär. Kaliforniýanyň ykdysadyýetinde iň uly paýy maliýe hyzmatlary, ätiýaçlandyryş we emläk sektory eýeleýär (25%). Ikinji we üçünji orunlarda bolsa, professional hyzmatlar (14%) we maglumat tehnologiýalary pudagy (12%) bar. Önümçilik pudagy 11%-i, lukmançylyk hyzmatlary we saglygy goraýyş bolsa 7%-i düzýär. Kaliforniýa ABŞ-nyň ähli oba hojalyk önümleriniň eksportynyň 17%-ini we kompýuter hem beýleki elektron enjamlarynyň eksportynyň 18%-ini üpjün edýär.
