Täze geçirilen barlagyň netijelerine görä, dünýäniň iň uly kompaniýalary klimatyň üýtgemegine 28 trillion dollarlyk zyýan ýetiripdir. Bu mukdar ABŞ-nyň 2024-nji ýyldaky jemi içerki önümine deň bolup, ählumumy maýlama sebäp bolýan parnik gazlarynyň zyňyndylarynyň netijesini görkezýär. Bu barada «Associated Press» habar berýär.
Sanawyň başynda Saudi Aramco bilen Gazprom durýar, olaryň hersi onlarça ýylyň dowamynda 2 trln dollardan gowrak zyýan üçin jogapkär hasaplanylýar. Ilkinji onlugyň hatarynda Chevron, ExxonMobil, BP, Shell ýaly beýleki iri nebit-gaz kompaniýalary hem bar. Alymlar «Carbon Majors» atly maglumat binýadyny ulanmak bilen, zyňyndylary kompaniýalar bilen baglanyşdyryp, olaryň klimata ýetirýän täsirini hasaplapdyrlar.
Barlagçylar şeýle hasaplamalaryň klimata degişli betbagtçylyklaryň öwezini dolmak boýunça açylýan kazyýet işlerinde peýdaly bolup biljekdigini belleýärler. Şol bir wagtyň özünde, käbir tankytçylar jogapkärçiligi diňe kömür we nebit ýaly baýlyklary gazyp alýan kompaniýalara ýüklemegiň, sarp edijileriň we beýleki pudaklaryň roluny äsgermezlikdigini öňe sürýärler. Şeýle-de bolsa, barlagyň awtorlary zyňyndylary azaltmak üçin gyssagly çäreleriň görülmelidigini aýdýarlar.
