«Liwerpul» futbol kluby taryhynda 20-nji gezek Angliýanyň Premýer-ligasynyň çempiony boldy. Klub ýekşenbe güni geçirilen oýunda «Tottenhemi» 5:1 hasabynda ýeňip, möhletinden öň çempionlygyny gazandy. Bu «Liwerpul» üçin 2020-nji ýyldan bäri Premýer-ligadaky ilkinji çempionlyk boldy.
Çempionat heniz tamamlanmady. «Mersisaýdlylar» ýene dört duşuşyk geçirmeli. Emma toparyň iň ýakyn bäsdeşi bolan Londonyň «Arsenalyndan» aratapawut indi ýetip bolmajak 15 utuk bolup durýar.
Şeýlelikde, «Liwerpul» Premýer-ligada we Angliýanyň beýleki ýokary ligalarynda çempionlyk sany boýunça «Mançester Ýunaýted» bilen deňleşdi.
Öň «Liwerpul» köp gezek Angliýanyň Birinji diwizionynyň ýeňijisi bolupdy, soňra şol liganyň ornuna 1992-nji ýylda Premýer-liga döredildi. Şondan bäri «mersisaýdlylar» diňe bir gezek, 2020-nji ýylda, Angliýanyň çempiony bolmagy başarypdy.
«Liwerpul» ilkinji gezek Angliýanyň ýokary ligasynda çempionlygyny 1900–1901 möwsüminde gazandy.
Toparyň baş tälimçisi, niderlandly Arne Slot üçin bu möwsüm toparyň başynda ilkinji ýyly boldy. Ol bu wezipä 2024-nji ýylyň 20-nji maýynda bellenilipdi. Ol Premýer-liganyň taryhynda toparyny ilkinji möwsüminde çempion eden bäşinji tälimçi boldy. Ondan ozal bu üstünliklere Žoze Mourinýo (2004–2005), Karlo Ançelotti (2009–2010), Manuel Pellegrini (2013–2014) we Antonio Konte (2016–2017) ýetipdi.
