24-nji aprelde Türkmenistanyň daşary işler ministriniň orunbasary Ahmet Gurbanowyň Ispaniýa saparynyň çäklerinde Madrid şäherinde iki ýurduň Daşary işler ministrlikleriniň arasynda geňeşmeler geçirildi.
Türkmenistanyň DIM-niň habar bermegine görä, duşuşykda ispan tarapyna Ispaniýa Patyşalygynyň DIM-niň halkara gatnaşyklar we ählumumy meseleler boýunça Döwlet sekretary Diego Martines Belio ýolbaşçylyk etdi.
Duşuşygyň dowamynda taraplar hyzmatdaşlygy pugtalandyrmagyň ileri tutulýan ugurlary, şol sanda işjeň syýasy dialogy dowam etdirmek, söwda-ykdysady we medeni-ynsanperwer gatnaşyklary giňeltmek barada pikir alyşdylar.
Şeýle hem diplomatlar iki ýurduň işewür toparlarynyň arasynda göni gatnaşyklary ýola goýmak arkaly söwda-ykdysady hyzmatdaşlygy pugtalandyrmagyň zerurlygyny nygtadylar. Bu ugurda ulgamlaýyn işi alyp barmak üçin şertler döretmek maksady bilen ikitaraplaýyn özara hyzmatdaşlyk mehanizmini, hususan-da Hökümetara topary ýa-da Iş geňeşini döretmek meselesi ara alnyp maslahatlaşyldy.
Mundan başga-da, söhbetdeşler medeni-ynsanperwer gatnaşyklaryň möhüm taraplaryny ara alyp maslahatlaşdylar. Şunuň bilen baglylykda, iki ýurduň arasyndaky medeni gatnaşyklary pugtalandyrmakda özara medeniýet, kino we sungat günleriniň ähmiýeti bellenildi.
Şol gün BMG-niň Bütindünýä syýahatçylyk guramasynyň ýerine ýetiriji direktory, BMG-niň Ženewadaky ýörite wekili Zorisa Uroşewiç bilen duşuşyk geçirildi.
Duşuşygyň barşynda syýahatçylyk pudagynda özara bähbitli hyzmatdaşlygy hem-de ulgamlaýyn dialogy ýola goýmak we berkitmek, Türkmenistanyň syýahatçylyk mümkinçiliklerini wagyz etmek we ilerletmek bilen bagly meselelere garaldy.
