Ýewropa Bileleşigi Apple we Meta kompaniýalaryna Sanly bazarlar hakyndaky kanuny (DMA) bozandygy üçin jerime saldy. Apple 500 million, Meta bolsa 200 million ýewro jerime tölemeli edildi. Bu barada «The Verge» neşiri habar berýär.
Apple kompaniýasyna App Store-daky işläp düzüjilere alternatiw töleg usullaryna gönükdirmäge rugsat bermändigi üçin jerime salyndy. Kompaniýa işläp düzüjilere beýleki töleg we abunalyk mümkinçiliklerini hödürleýän web sahypalaryna geçýän baglanyşyklary goýmaga mümkinçilik bermeýärdi. Bu strategiýa ýewropaly sarp edijileriň saýlaw azatlygyny çäklendirýär diýlip kabul edildi.
Meta kompaniýasy bolsa Facebook-daky we Instagram-daky ulanyjylary mahabat görmezlik üçin töleg tölemäge ýa-da şahsy maglumatlarynyň ulanylmagyna razy bolmagyna mejbur edýän modeli ulanypdy. Ýewropa Komissiýasy bu ýagdaýyň hem ulanyjylaryň azatlygyny bozýandygyny aýtdy.
Her iki kompaniýa hem 60 günüň dowamynda bu düzgün bozmalary düzetmeli, bolmasa goşmaça we has uly jerimeler bilen ýüzbe-ýüz bolarlar.
DMA 2023-nji ýylda güýje giripdi we sanly bazarlarda bäsdeşligi üpjün etmek üçin döredildi. Bu kanun esasynda Apple, Meta, Google, Amazon ýaly iri tehnologiýa kompaniýalary «derwezeban» hökmünde ykrar edilýär we aç-açanlyk, adalatlylyk talaplaryny ýerine ýetirmäge borçlandyrylýar.
Apple bu karara garşy çykjakdygyny mälim etdi. Meta bolsa kanunlaryň amerikan kompaniýalaryna garşy has agyr ulanylýandygyny öňe sürdi.
