Saud Arabystany Er-Riýadyň demirgazygynda guruljak täze etrap üçin konsepsiýanyň baş meýilnamasyny hödürledi. Paýtagtyň bu etraby hakykatda doly hukukly şähere öwrüler we beýikligi iki kilometrden gowrak belent bina - dünýäniň iň beýik binasy onuň esasy obýekti bolar.
Mundan başga-da, sebitde ýaşaýyş jaýlary, täjirçilik merkezleri, syýahatçylyk desgalary, lukmançylyk we bilim edaralary, şeýle hem güýmenje toplumlary bolar.
Täze “geljegiň şäheri” üçin baş meýilnama SOM (Skidmore, Owings we Merrill) amerikan binagärlik býurosy tarapyndan taýýarlandy.
Býuro 1936-njy ýylda Çikagoda Luis Skidmor we Nataniel Ouings tarapyndan esaslandyryldy. SOM häzirki wagtda dünýäniň iň beýik binasy bolan Dubaýdaky “Burj-Halifany”, şeýle hem Çikagodaky Uillis-taueri we Nýu-Ýorkda Bütindünýä söwda merkezi 1-i taslamalaşdyrdy. Taryhynyň dowamynda bu kompaniýa dünýäniň elli ýurdunda, takmynan, 10 000 taslamany durmuşa geçirdi we 800 dürli baýrak aldy, şol sanda iki gezek “Ýylyň arhitektura firmasy” adyna eýe boldy.
