Tailandda emeli aňly ilkinji polisiýa-robot hödürlendi. Ol Songkran baýramynyň bellenilen wagtynda synagdan geçirildi diýip, Interesting Engineering portaly habar berýär.
Robot Pol Col Nakhonpathom Plod Phai adyny aldy, bu bolsa “Nakhonpathom howpsuz ýagdaýda” diýmegi aňladýar. Robot Muang sebitinde geçirilen Tonson-Roud festiwalynda synagdan geçirildi.
AI Police Cyborg 1.0 360 gradus syn ediş kamerasy bilen enjamlaşdyrylyp, ýerli wideo gözegçiligi ulgamyna birikdirildi. Ol dronlardan maglumatlary alýar, köçelerdäki ýagdaýy seljerýär we maglumaty dolandyryş merkezine iberýär.
Onuň esasy funksiýasy – ýüzi tanamak. Robot adamyň gözlenilýändigini ýa-da töwekgelçilik toparyna degişlidigini kesgitleýär. Ol boýy, jynsy, bedeniň gurluşyny, egin-eşigi we özüni alyp barşyny seljerýär. Eger dawa ýa-da güýç ulanmak synanyşygy başlasa, robot muny hem bellige alýar.
Şeýle-de, ol pyçak, taýak ýaly howply predmetleri hem tapawutlandyrýar, şol bir wagtyň özünde oňa Songkran wagty köpler tarapyndan ulanylýan oýunjak suw sapançalaryna üns bermezlik öwredildi.
Polisiýa işgäriniň aýtmagyna görä, robot gije-gündiz köçelerde patrullyk edip, howplara çalt jogap berip bilýär.
Şeýle tehnologiýalar eýýäm Hytaýda ulanylýar, bu ýerde robotlar patrullara kömek edip, hatda suwda hereket edýär.
