NASA Boeing kompaniýasynyň Starliner kosmos gämisiniň ýene Halkara kosmos stansiýasyna iberiljekdigini habar berdi. Ýöne bu gezek ol ekipažly däl-de, diňe ýük bilen uçar.
Maglumatlara görä, kompaniýa bilen 2024-nji ýylda baglaşylan ekipažly gämi barada şertnama üýtgediler. Indiki uçarmansyz ýük missiýasy Starliner-1 adyny aldy we ol 2026-njy ýylyň aprelinden ir bolmaz. Uçuş üstünlikli bolan ýagdaýynda, gäminiň stansiýa we yzyna indiki uçuşlary ekipažly amala aşyrylar. Starliner-iň HKS-e soňky iki missiýasy hökmany däl bolup galýar.
Ilkibaşda NASA bilen Boeing-iň arasyndaky şertnama Halkara kosmos stansiýasyndaky ekipažy çalyşmak üçin Starliner-iň alty ekipažly missiýasyny göz öňünde tutupdy.
Belläp geçsek, öňki synanyşyklaryň ählisi şowsuz tamamlandy. Starliner-iň 2019-njy ýylyň dekabrynda bolan ilkinji uçuşy ekipažsyz geçdi we ony programma üpjünçiligi bilen bagly näsazlyk sebäpli bes etmeli boldy. Şol sebäpli ol HKS bilen birleşip bilmedi. Ikinji uçuş – Orbital Flight Test 2 2022-nji ýylyň maýynda boldy. Bu gämi hem ekipažsyz uçdy, stansiýa ýetdi, ýöne hereketlendiriji näsazlygy bilen ýüzbe-ýüz boldy.
Soňra NASA 2024-nji ýylda astronawtlar Butç Uilmor we Sunita Uilýams bilen ilkinji ekipažly uçuşdan öň iki ýyldan gowrak wagtlap Starliner-iň ýerüsti synaglaryny geçirdi. HKS-e ýakynlaşan wagty gämide ýene hereketlendiriji bilen bagly näsazlyk ýüze çykdy. Ahyrynda Starliner stansiýa bilen birleşdi, ýöne maslahatlaşmalardan soň, NASA Boeing-e enjamyň Ýere ekipažsyz dolanjakdygyny aýtdy. Bir ýyldan soň diýen ýaly bu näsazlyklaryň ölüm howply bolandygy anyklandy.
Netijede, 2024-nji ýylda Dragon missiýasy uçuryldy, onuň bortunda dört däl-de iki astronawt bardy – bu hem 2025-nji ýylyň martynda Uilmor bilen Uilýamsyň Ýere howpsuz gaýdyp gelmegine mümkinçilik berdi.
