Saud Arabystanynda 2025-nji ýyl möwsüminiň “Formula-1” çempionatynyň bäşinji tapgyry geçirildi. Ýaryşda birinji orny 50 aýlawy 1 sagat 21 minut 6.758 sekuntda geçen “Maklarenden” Oskar Piastri eýeledi. Bu onuň möwsümde üçünji ýeňşidir.
Ikinji orny “Red Bulldan” Maks Werstappen eýeledi (+2,843). Ol ýoldan daşary ozuşy üçin bäş sekuntlyk jerime aldy. Şeýle-de, ol janköýerler tarapyndan günüň ýaryşa gatnaşyjysy diýlip saýlandy.
Üçünji bolup pellehana Şarl Lekler geldi (+8,104). Bu hem şu möwsümde “Ferrari” üçin ilkinji baýrakly orun boldy.
Lando Norris iň gowy aýlawy görkezdi (1.31,778). Ol onunjy orundan bat alsa-da, pellehana dördünji bolup geldi.
Piastri 99 utuk bilen çempionatda birinji orna çykdy. Norris 89 utuk bilen ikinji, Werstappen 87 utuk bilen üçünji orny eýeleýär.
Konstruktorlaryň kubogynda “Maklaren” öňde barýar (188 utuk), onuň yzyndan “Mersedes” (111 utuk), “Red Bull” (89 utuk) we “Ferrari” (78 utuk) gelýär.
Çempionatyň indiki tapgyry 2 – 4-nji maýda Maýamide geçiriler.
