«Mercedes» toparyndan çempionatyň lideri Andrea Kimi Antonelli 2026-njy ýylyň Formula-1 möwsüminiň altynjy tapgyry bolan Monakonyň Gran-prisinde ýeňiş gazandy. Ýaryş 7-nji iýunda Monte-Karlo şäheriniň awtodromynda geçirildi.
Antonelli üçin bu üstünlik yzly-yzyna gazanylan bäşinji ýeňiş boldy.
Ikinji orny «Ferrari» toparyndan Lýuis Hemilton eýeledi, üçünji bolup «Red Bull» toparyndan Isak Hažar pellehana geldi. «Red Bull» toparynyň gyzyl baýdaklar astynda Hažaryň bolidinde üýtgeşmeler edendigini we munuň Isaka podiumdan mahrum bolmagyna az galandygyny bellemek gerek. «Red Bull» derňew wagty öz haklylygyny subut etmegi başardylar.
Ýaryş «Ferrari-niň» piloty Şarl Lekleriň ýol heläkçiliginden soň, 68-nji aýlawda gyzyl baýdaklar bilen togtadyldy. Wakadan bada-bat soň, monegask (Monakonyň wekili) toparyň radiosy arkaly bolidiniň tormoz ulgamynyň işini emosional görnüşde tankyt etdi.
Lekler mundan ozal hem «Ferrari» awtoulagynyň tormozlary barada ençeme gezek şikaýat edip, bu meseläniň Monakodaky şowsuzlyklaryň esasy sebäpleriniň biri bolandygyny aýdypdy.
Ýaryş togtadylan pursadynda Antonelliden, Hemiltondan we Hažardan soňra «Mercedes-den» Jorj Rassell we «Alpine-den» Pýer Gasli gelýärdi. Iki pilotyň hem geçilmedik jerimeleri bardy.
Ýaryşyň dowamynda ýedi pilot pellehana ýetip bilmedi.
