Tesla kompaniýasy Tehas ştatynyň (ABŞ) Ostin şäherindäki zawodynda «Cybertruck» elektropikabynyň önümçiligini azaltmaga karar berdi. Kompaniýanyň bu ädimi ätmeginiň sebäbi, Demirgazyk Amerikada islegiň örän pes bolmagy we halkara derejesindäki düzgünleşdiriji çäklendirmeler bilen baglanyşykly.
Kompaniýanyň önümçilik prosesleri bilen tanyş çeşmeleriň «Business Insider» neşirine beren maglumatyna görä, önümçilikdäki çäklendirme geçen ýylyň dekabr aýynda başlapdyr.
«Cybertruck-y» ýygnamak üçin gurlan käbir hatarlar häzirki wagtda iň pes kuwwatynda işleýär. Pikaby öndürýän işgärleriň käbirleri «Model Y» krossowerini ýygnamak üçin, şol zawodyň beýleki bölümlerine geçirilipdir. Käbir ýagdaýlarda «Cybertruck-yň» önümçilik hatarynda işleýän işgärleriň sany iki esse azaldylypdyr. Ostindäki zawodda işgärleriň awtoulag duralgalaryndaky boş ýerleriň artmagy hem işgärleriň başga ýerlere geçirilendigini görkezýär.
«Cox Automotive» analitikleriniň berýän maglumatlaryna görä, 2025-nji ýylyň birinji çärýeginde Tesla bary-ýogy 6406 sany «Cybertruck» satypdyr, bu bolsa öňki çärýek bilen deňeşdirilende iki esse azdyr. Ilon Mask pikabyň önümçiligine başlamazyndan öň, 1 milliondan gowrak sargyt alandygyny aýdypdy, ýöne 2025-nji ýylyň 20-nji martynda başlan yzyna çagyryş kampaniýasynyň maglumatlaryna görä, häzirki wagta çenli diňe 50 müňden hem az «Cybertruck» öndürilipdir.
Tesla aprel aýynda «Cybertruck-yň» yzki tekerlerden herekete getirilýän wersiýasyny 70 müň dollardan hödürledi. Önümçilik peseldilse-de, Ilon Mask geljekki iki ýylda ABŞ-da elektromobilleriň önümçiligini iki esse artdyrmagy wada berýär. Şol bir wagtyň özünde, kompaniýa fewral aýyndan bäri işgär sanyny hem azaldyp başlady, emma bu azaltmalar häzirlikçe giň gerimli däl.
