Nike we Hyperice kompaniýalary türgenler üçin niýetlenen, myşsalaryň türgenleşikden öň taýýarlanylmagyna we türgenleşikden soň çalt dikeldilmegine ýardam berýän ýokary tehnologiýaly Hyperboot krossowkalaryny satuwa çykarandyklaryny habar berdiler.
Hyperboot krossowkasy Normatec tehnologiýasy esasynda taýýarlanyldy. Iki gatly howa kameralary arkaly basyşly massaž täsiri döredilýär, gyzdyryjy elementler bolsa dabany hem-de topugy deň derejede gyzdyrýar. Bu bolsa myşsalaryň türgenleşikden öň taýýarlanylmagyna we türgenleşikden soň çalt dikeldilmegine uly kömek edýär.
Üç derejeli ýylylyk we basyş sazlamalaryna aýakgabyň üstündäki düwmeler arkaly ýa-da ýörite ykjam goşundy arkaly gözegçilik edip bolýar. Aýakgabyň içinde, dabanyň astynda ýerleşýän batareýa ony özbaşdak, ýagny simsiz ulanmak mümkinçiligini berýär.
Bu tehnologiýa ilkinji gezek 2024-nji ýyldaky Olimpiýa oýunlarynda görkezildi. Lebron Jeýms ýaly birnäçe meşhur türgen bu önümiň «hereketlilik we terapewtiki täsiriniň utgaşmasyna» ýokary baha berdi.
Krossowka 17-nji maýdan başlap Demirgazyk Amerikada satuwa çykarylar we ilki bilen Nike.com, Hyperice.com ýaly resmi web sahypalarynda hem-de saýlanan dükanlarda satylar. Bahasy – 899 dollar.
Dünýä boýunça satuwyna 2025-nji ýylyň ahyrynda başlamak meýilleşdirilýär.
