Mureş uýezdinde ýerleşýän Brýaza rumyn kommunasyndan iki höwesjeň demir gözleýji detektory ulanyp, gadymy frakiýa taýpalaryna – daklara degişli hazyna tapdy.
Arkeonews neşiriniň maglumatlaryna görä, tapyndynyň düzümine alty sany şaý-sep girýär. Olaryň arasynda ösümlik nagyşlary salnan tegelek kümüş bilezik, gülýaka (fibula), üç şelpeli zynjyr we gün nagyşlary salnan süýnmek plastinalardan ýasalan guşak bar. Şeýle äheňler, köplenç, gün kultlary we gadymy ynançlar bilen baglanyşyklydyr.
Tapylan şaý-sepleriň umumy agramy, takmynan, 550 gram kümüş. Olar dak jemgyýetiniň asylly agzalaryna degişlidir diýlip çak edilýär.
Bu açyş ylmy ähmiýete hem eýe. Bu owal hiç bir ilatly ýeriň ýa-da medeniýetiniň başga yzlary tapylmadyk bu sebitde daklaryň bolandygynyň ilkinji tassyknamasydyr.
