Ferrari kompaniýasy 9-njy oktýabrda özüniň ilkinji düýbünden täze elektrik awtoulagyny hödürlär. Bu barada markanyň direktorlar geňeşiniň başlygy Jon Elkann habar berdi diýip, Reuters onuň sözlerini getirýär.
Elkann modeli Ferrari Elettrica diýip atlandyrdy, ýöne munuň gutarnykly ady boljakmy ýa-da ýok, ony takyk aýtmady. Markanyň bu çärä ençeme ýyllap taýynlyk görendigini aýtdy.
Onuň ilkinji görkezilişi elektrik awtoulagyň işlenip düzülýän we ýygnaljak ýeri bolan Maranelloda geçiriljek açyk gapylar gününiň çäginde bolar. Ony döretmekde Formula 1-de we beýleki ýaryşlarda kämilleşdirilen tehnologiýalar ulanyldy. Täze önümiň tehniki häsiýetnamalary entek aýan edilmedi.
Ferrari 2019-njy ýylda gibrid awtoulaglary öndürip başlady. 2024-nji ýylda olar eýýäm markanyň satuwynyň 51% -ini eýeledi. Kompaniýanyň top-menejeriniň sözlerine görä, Ferrari mundan beýläk-de benzin, gibrid we elektrik güýç gurluşly ulaglary ösdürmegi dowam etdirer.
2024-nji ýylyň tomsunda elektrik awtoulagynyň prototipiniň gizlin düşürilen suratlary peýda boldy. Suratda pes krossower ýa-da uly hetçbek görünýär, ýöne beýle kuzow diňe wagtlaýyn çözgütdir. Modeliň başlangyç bahasy azyndan 500 müň ýewro bolar diýlip garaşylýar.
