Wýetnamda çalt ykdysady ösüş we ulag infrastrukturasynyň ösmegi sebäpli çäge ýetmezçiligi ýüze çykdy. Ýurt Kambojadan importy artdyrdy, ýöne çäge gazyp almak bilen bagly güýçlendirilen düzgünler täze meseleleri döredýär diýip, Bloomberg habar berýär.
Donald Trampyň birinji prezidentlik möhleti wagtynda ABŞ bilen Hytaýyň arasyndaky ýitileşen söwda gapma-garşylygy Hytaýdan zawodlaryň Wýetnama geçirilmegine sebäp boldy. Bu hem ýurtda ykdysady ösüşe getirdi: 2024-nji ýylda ýurduň JIÖ-si 7% artdy.
Önümçiligiň ösmegi ulag ulgamy bilen bagly meseleleri döretdi. Olary çözmek üçin häkimiýetler ýollary gurmak we giňeltmek boýunça giň gerimli taslamalara başlady, bu bolsa Kambojadan çäge talap edýärdi.
Häzir bolsa Wýetnam çäge ýetmezçiligini başdan geçirýär. Çünki, ýurduň derýalaryndan çägäniň alynmagy kenarlaryň çökmegine we ýerli ýaşaýjylaryň nägileligine getirenden soň, hökümet bu pudaga gözegçiligi güýçlendirdi.
“Awtoulag ýollaryny gurmak üçin çägäniň gazylyp alynmagyny giňeltmek berk düzgünler sebäpli kyn” – diýip, Hanoýdaky RMIT uniwersitetinden infrastruktura hünärmeni Hung Nguýen belledi.
Ýetmezçiligi dolmak üçin, Wýetnam Kambojadaky Mekong derýasyndan çäge importyny artdyrdy. 2023-nji ýylda import möçberi üç esse, 2024-nji ýylda iki esse artdy. Win Suong şäheri esasy kabul ediş nokadyna öwrüldi: 2024-nji ýylyň 9-njy martynda hemra suratlary ol ýerde çägeli 385 ýük gämisini görkezdi. Deňeşdirmek üçin, 2020-nji ýylyň fewralynda olaryň sany 83-den köp däldi.
