Ýaponiýanyň Kunisaki şäherinde alty aýlap «Oita Hello Kitty howa menzili» diýlip atlandyryljak täze howa menzili açyldy. Bu barada Sanrio Entertainment kompaniýasy «PR Times» portaly arkaly habar berdi.
Bu üýtgeşme Oita prefekturasynyň 2025-nji ýylyň 13-nji aprelinden 13-nji oktýabry aralygynda Osakada geçiriljek «EKSPО — 2025» sergisine gatnaşmagy bilen baglanyşyklydyr. Serginiň geçirilýän döwründe, howa menziliniň içi Hello Kitty bilen Sanrio brendiniň beýleki meşhur keşpleri bilen bezeler. Şeýle-de binanyň içinde ýolagçylary garşy aljak meşhur gahrymanlaryň heýkelleri ýerleşdiriler.
Mundan başga-da, howa menzili bilen Harmonyland tematik seýilgähiniň aralygynda iýul aýynyň ahyryndan noýabr aýyna çenli ýörite awtobus gatnawy ýola goýlar. Şeýle hem howa menzilindäki dükanlarda diňe Harmonyland üçin ýörite taýýarlanan, çäklendirilen harytlar satuwa çykarylar.
Harmonyland – Sanrio-nyň gahrymanlaryna bagyşlanan tematik seýilgäh bolup, ol Oita prefekturasynda, howa menziliniň golaýynda ýerleşýär.
«Harmonyland geljek ýyl 35 ýyllygyny belleýär. Biz Oita prefekturasyndaky ähli ýaşaýjylara häzire çenli bilelikde döreden ähli ýatlamalarymyz üçin çyn ýürekden minnetdarlygymyzy bildirýäris» — diýip, Sanrio-nyň prezidenti Aýa Komaki aýtdy.
Şeýle-de Sanrio Entertainment sosial torlarda ýörite kampaniýanyň başladylandygyny mälim etdi. Onuň çäklerinde, gatnaşyjylar #HELLOFromOitatoTheWorld heştegi bilen Harmonyland seýilgähindäki suratlaryny neşir etmek boýunça höweslendirilýär.
Çäre tamamlanandan soň, howa menzili ýene «Oita howa menzili» diýlip atlandyrylar.
