Bagama adalarynyň hökümeti daşky gurşaw boýunça derňewler doly tamamlanýança, SpaceX kompaniýasynyň Falcon 9 raketalarynyň ýurduň çägindäki suwlara gonmagynyň togtadylýandygyny habar berdi.
“Daşky gurşawa ýetýän täsire doly baha berilýänçä, mundan beýläk hiç hili ygtyýarnama berilmez” – diýip, Bagama adalarynyň aragatnaşyk direktory Latrae Raming aýtdy.
Ozal, fewral aýynda, Falcon 9-yň Eksuma-Saund sebitine ilkinji gonuşyndan soň, ýurduň häkimiýetleri degişli edaralardan ygtyýarnama almak şerti bilen ýene 19 uçuşy tassyklady.
Derňew üçin sebäp bolsa geçen aý Tehasdaky kosmodromdan uçandan tiz wagtdan soň ýarylan Starship gämisi bilen bagly waka boldy. Sosial ulgamlardaky wideo ýazgylarynda gäminiň döwük bölekleriniň Günorta Floridanyň we Bagamalaryň üstünden uçup geçişi görünýär. Habar berlişi ýaly, hereketlendirijiler işlemegini bes edenden soň, gämi pyrlanyp başlady.
Hökümetiň maglumatlaryna görä, döwük bölekler Bagama adalarynyň howa giňişligine düşdi. Häkimiýetler olarda zäherli maddalaryň ýokdugyny we olaryň deňiz ekoulgamyna ýa-da suwuň hiline uly zyýan ýetirmejekdigini belledi.
Eksuma-Saund sebiti SpaceX tarapyndan Falcon 9-yň birinji basgançaklarynyň deňiz platformalaryna gonuşy üçin ulanylýar. Bu ýer töwekgelçilikleri azaltmak üçin suwuň çuňlugy we gämi işjeňliginiň pesdigi üçin saýlandy.
