Insaýderler Redmi Turbo 4 Pro we Xiaomi 16 smartfonlary barada täze maglumatlary habar berdiler. Enjamlar ýokary kuwwatly batareýalary we Qualcomm-yň iň täze prosessorlaryny alyp bilerler.
Smart Pikachu insaýderiniň habar bermegine görä, ýakyn wagtda çykjak Redmi Turbo 4 Pro 7500 mAh akkumulýator alar. Onda, ölçegini känbir ulaltmazdan, kuwwatyny artdyrmaga mümkinçilik berýän kremniy-uglerod tehnologiýasy ulanylar.
Gajet Qualcomm-yň Snapdragon 8s Gen 4 prosessoryna esaslanan ilkinji smartfonlaryň biri bolar. Deslapky synaglara görä, onuň öndürijiligi flagman Snapdragon 8 Gen 3 bilen deňeşdirilýär. Enjam içki kuwwatyna goşmaça premium dizaýny hem alar, ýagny onuň demir çarçuwaly aýna korpusy bolar.
Hindistan bilen birlikde halkara bazarlarynda bu modeliň F7 modeli hökmünde Poco brendi astynda çykarylmagy mümkin. Şeýle-de bolsa, bilermenleriň pikirine görä, global wersiýa şonuň ýaly kuwwatly batareýany saklap galmasa gerek. Sebäbi, owaldanam Xiaomi smartfonlarynyň Poco wersiýalary, hytaý asyl nusgalary bilen deňeşdirilende, mydama az kuwwatly batareýalar bilen enjamlaşdyrylyp gelinýär.
Redmi Turbo 4 Pro-nyň tanyşdyrylyş dabarasynyň aprel aýynyň ahyrynda bolmagyna garaşylýar. Smartfon öndürijiligi boýunça orta aralyk enjam hökmünde ýerleşýär.
Flagman Xiaomi 16 modeli barada ýaýradylan maglumata görä, smartfonyň esasy wersiýasy 7000 mAh akkumulýatory alar. Deňeşdirmek üçin, Xiaomi 15-de 5400 mAh akkumulýator bar. Ekranyň diagonalynyň 6,36 dýumdan 6,4 dýuýma çenli ulalmagy, has uly batareýany gurmaga mümkinçilik döredip biler diýip, çeşme belleýär.
Xiaomi 16 setiriniň yglan edilmegine 2025-nji ýylyň ikinji ýarymynda garaşylýar.
