Xiaomi kompaniýasy Hytaýda bellenilýän täze ýyl baýramçylygy bilen baglylykda HyperOS programma üpjünçiliginiň täzelenmelerini çykarmagy wagtlaýynça bes edýär. Bu barada XiaomiTime tehnologiýa resursy habar berýär.
Maglumatlara görä, kompaniýanyň iş depgini takmynan iki hepde töweregi haýallap, bu döwür 17-nji fewraldan 3-nji marta çenli dowam eder. Bu aralykda HyperOS-yň täze wersiýalary çykarylmaz. Ulgamyň içerki barlag (beta) wersiýalarynyň üstünde işlemek hem wagtlaýynça duruzyldy.
Ýüze çykan kemçilikler baradaky hasabatlary kabul etmek we işiň gidişi baradaky habarlary çap etmek hem arakesme döwründe togtadylyp goýuldy.
Ýakyn günlerde HyperOS ulanyjylaryna täze funksiýalaryň ýa-da ulgamdaky ýalňyşlyklaryň (baglaryň) düzedilmeleriniň gelmegine garaşylmaýar. Häzirki wagtda käbir ulanyjylara gelip gowuşýan täzelenmeler bolsa, baýramçylyk arakesmesinden birnäçe hepde öň, öňünden taýýarlanan programma üpjünçilikleridir.
XiaomiTime-yň bellemegine görä, işleriň haýallamagy eýýäm birnäçe gün mundan ozal başlady. Içerki synag nusgalarynyň üstündäki işler bolsa 4-5 gün ozal doly diýen ýaly bes edildi.
