Iki gezek “Oskar” baýragynyň eýesi Keýt Blanşett durmuşynyň başga bir taraplaryna ünsi jemlemek üçin aktýorlyk karýerasyny tamamlamagy meýilleşdirýändigini aýtdy.
Radio Times bilen söhbetdeşlikde 55 ýaşly awstraliýaly aktrisa, hakykatdanam, üýtgeşme isleýändigini habar berdi.
“Meniň maşgalam her gezek bu barada aýdanymda gözlerini tegeleýär, ýöne bu hakykat: aktýorlyk karýeramy bes etmek isleýärin. Meniň şahsy durmuşymda meşgullanjak zatlarym köp” – diýip, Blanşett belledi.
Aktrisa üns merkezinde özüni oňaýsyz duýýandygyny we jemgyýetçilik durmuşyndan çetde galmagy makul bilýändigini aýtdy.
2025-nji ýylyň ýazynda Blanşett Londonyň Barbican teatrynda “Çarlak” sahnalaşdyrmasynda Arkadinanyň roluny ýerine ýetirdi. Şeýle-de, ol režissýor Stiwen Soderbergiň “Gara halta” trillerine gatnaşdy. Ýylyň ahyryna çenli onuň gatnaşmagynda Jim Jarmuşyň “Kaka, eje, uýa, aga” maşgala dramasynyň çykmagyna garaşylýar.
30 ýyldan gowrak dowam eden karýerasynyň dowamynda Blanşett dürli keşpler bilen tanaldy. “Ýelizaweta” filminde (1998) şa aýaly Ýelizaweta I-iň keşbi onuň üstünligi boldy, munuň üçin ol “Oskar” baýragyna dalaşgär görkezildi. Ol “Awiatorda” (2004) Ketrin Hepbýornyň keşbi üçin “Ikinji plandaky iň gowy aktrisa” we “Jasmin” dramasy (2013) üçin “Iň gowy aktrisa” hökmünde bu baýraga mynasyp boldy. Umuman alanyňda, Blanşett “Oskar” baýragyna sekiz gezek dalaşgär görkezildi.
Onuň belli işleriniň arasynda “Ýüzükleriň hökümdary” (Властелин колец) trilogiýasyndaky, “Kerol” (Кэрол), “Men ol ýerde” (Я там), “Tar” (Тар) filmlerindäki we “Hanym Amerika” (Миссис Америка) serialyndaky keşpleri bar. Şeýle-de, ol teatrda işjeň işledi we adamsy, dramaturg Endrýu Apton bilen bilelikde Sidneý teatr jemgyýetiniň çeper ýolbaşçysy boldy.
