HBO telekompaniýasy Garri Potter baradaky täze serialda esasy uly ýaşly gahrymanlaryň keşplerini ýerine ýetirjek aktýorlary resmi taýdan tassyklady. «Deadline» neşiriniň habaryna görä, serialda dört hemişelik gahryman bilen bilelikde ikinji derejeli keşbi ýerine ýetirjek iki sany aktýor hem belli boldy.
Mundan ozal, «Hogwarts» jadygöýlik mekdebiniň müdiri Albus Dambldoryň keşbini Jon Litgouwyň ýerine ýetirjekdigi barada habar berlipdi.
Täze maglumatlara görä, zäher taýýarlamak boýunça professor Sewerus Sneýpiň keşbini Paapa Essýedu ýerine ýetirer. «Griffindor» fakultetiniň dekany Minerwa MakGonagallyň keşbini aktrisa Janet Maktir ýerine ýetirer. Professor Kwirinus Kwirrelliň keşbini Lýuk Tallon, tokaýçy Rubeus Hagridiň keşbini Nik Frost, hojalyk işgäri Argus Filçiň keşbini bolsa Pol Uaýthaus ýerine ýetirer.
Esasy çagalaryň keşbini – Garri Potter bilen onuň dostlary Ron Uizliniň we Germiona Greýnjeriň keşbini kimleriň ýerine ýetirjekdigi entek belli däl diýip, «Variety» neşiri ýazýar. HBO bu keşpler üçin, 2024-nji ýylyň güýzünde açyk kasting geçiripdi. Şol kastinge 30 müňden gowrak çaga gatnaşypdy.
HBO Garri Potter älemi boýunça serialyň taýýarlanýandygyny ilkinji gezek 2023-nji ýylyň aprelinde mälim edipdi. Telekompaniýa bu serialyň ýazyjysy Joan Roulingiň «meşhur kitaplarynyň takyk adaptasiýalaşdyrylan görnüşi» boljakdygyny aýdypdy. Serialyň surata düşüriş işlerine 2025-nji ýylyň tomsunda başlanylmagyna garaşylýar.
