14-nji aprelde Ýaponiýada saparda bolýan Prezident Serdar Berdimuhamedow Osaka şäherinde geçirilýän «EKSPO — 2025» Bütindünýä sergisiniň çäginde guralan Türkmenistanyň Milli gününe gatnaşdy. Bu barada “Türkmenistan” gazetiniň elektron neşiri habar berýär.
Irden «EKSPO — 2025» Bütindünýä sergisiniň ýokary derejeli myhmanlary kabul ediş binasynda Prezident Serdar Berdimuhamedow serginiň Hormatly myhmanlar kitabynda ýadygärlik ýazga galdyrdy. Soňra döwlet Baştutany Ýaponiýanyň “EKSPO — 2025” Bütindünýä sergisi boýunça ministri Ito Ýoşitaka bilen bilelikde Türkmenistanyň Milli güni mynasybetli dabara gatnaşyp, bu ýerde söz sözledi.
Bu ýerde şeýle hem şu günler Ýaponiýada bolýan türkmen medeniýet we sungat ussatlarynyň çykyşlary ýaýbaňlandyryldy. Soňra Prezident Serdar Berdimuhamedow Ýaponiýanyň resmi wekilleri bilen bilelikde Türkmenistanyň milli pawilýonyna baryp gördi. Döwlet Baştutany dabara gatnaşyjylaryň şowhunly el çarpyşmalary astynda pawilýonyň toý bagyny kesdi. Soňra bu özboluşly desga bilen tanyşlyk boldy. Belent mertebeli myhmanlar ýurdumyzyň taryhyny, gözel tebigatyny, milli baýlyklaryny, ýeten belent sepgitlerini beýan edýän, 3D animasiýa görnüşinde taýýarlanan wideoşekile tomaşa etdiler.
Binanyň ikinji gatynda Arkadag şäheriniň, Türkmenistanyň ministrlikleriniň we pudak edaralarynyň sergi eksponatlary ýerleşýär. Üçünji gatda bolsa myhmanlara türkmen milli tagamlary hödürlenilýär. Soňra Serdar Berdimuhamedow we Ýaponiýanyň resmi wekilleri «Günüň dogýan ýurdunyň» milli pawilýony bilen hem tanyşdylar.
Türkmenistan bu iri gözden geçirilişe gatnaşýan 160-a golaý ýurduň arasynda öz Milli gününi ilkinjileriň hatarynda geçirmek hormatyna eýe boldy.
