Amerikan kinoakademiýasy 2028-nji ýyldan başlap filmdäki iň oňat trýuklaryň dizaýny üçin “Oskar” baýragyny gowşuryp başlar. Täze kategoriýa kaskadýorlaryň kino pudagyna goşýan goşandyny ykrar eder. Nominasiýa baýragyň 100 ýyllygy mynasybetli hödürlener diýip, Independent habar berýär.
Baýraga dalaşgärler hökmünde 2027-nji ýylda goýberiljek filmler göz öňünde tutular.
"Kino sungatynyň dörän ilkinji günlerinden başlap, trýuklar kino önümçiliginiň aýrylmaz bir bölegi bolup durýar. Bu tehniki we döredijilikli sungat işgärleriniň täzeçillik işlerine mynasyp baha berip biljekdigimize buýsanýarys " - diýip, Kinoakademiýanyň baş direktory Bill Krameriň we onuň prezidenti Janet Ýangyň bilelikdäki beýanatynda aýdylýar.
Täze nominasiýany goşmak baradaky başlangyç bilen meşhur kaskadýorlar we trýuklary sazlaýjylar Dewid Leýtç we Kris O'Hara çykyş etdi. Olar Akademiýanyň agzalaryndan trýuklary baýragyň kategoriýalarynyň hataryna goşmagy haýyş etdiler.
Häzirki wagtda Kinoakademiýanyň düzüminde 100-den gowrak kaskadýor bar. Akademiýanyň agzalarynyň umumy sany 8000 kino hünärmeninden geçýär.
Şeýle hem 2026-njy ýylda ilkinji gezek aktýor seçip alyjy hünärmenleriň işini ykrar etmek üçin aýratyn baýrak berler. Kasting boýunça baýrak esasy dabaranyň çäginde gowşuryljakmy, ýa däl entek belli däl.
