Beýik Britaniýada ýatgysy (matka) oturdylan aýal ilkinji gezek eje boldy. Bu barada BBC habar berýär.
36 ýaşly Greýs Dewidson işlemeýän ýatgy bilen dünýä indi we 2023-nji ýylda oňa aýal doganynyň organy oturdyldy. Bu ýurtda şeýle görnüşli ilkinji üstünlikli operasiýa boldy.
Indi bolsa Greýsiň fewral aýynda gyzjagazynyň dünýä inendigi belli boldy. Ol we onuň adamsy, 37 ýaşly Angus çagany donoryň hatyrasyna Emi diýip atlandyrdy. Çaganyň agramy iki kilogramdan gowrak boldy.
Greýs Emini elinde saklamagyň “täsindigini” we birneme “hyýalydygyny” aýdýar.
“Bu diýseň haýran galdyryjy boldy, sebäbi biz munuň nähili boljakdygyny – onuň haçan peýda boljakdygyny asla göz öňüne-de getirip bilmedik. Bu, hakykatdanam, ajaýyp” – diýip, ol belledi.
Greýs adamsy bilen Londonyň demirgazygynda ýaşaýar. Onuň asly Şotlandiýadan we indi ol maşgalasyna ýene bir çaganyň goşulmagyny arzuw edýär. Ilkibaşda är-aýal özüni tanyşdyrmak islemedi, ýöne Emi sag-aman doglandan soň, olar bu wakany Bi-bi-si bilen paýlaşmaga razy boldy.
Hirurglar ýogalan donorlardan ýene üç ýatgy transplantasiýasyny geçirendigini habar berdi. Umuman, olar kliniki synaglaryň dowamynda şeýle operasiýalardan azyndan 15 sanysyny geçirmegi meýilleşdirýär.
