Amerikan kompaniýasy H2 Clipper uçarlary we beýleki aerokosmos tehnikasyny ýygnamaga ukyply bolan robotlar toparynyň tehnologiýasyna patent aldy. Bu barada The Robot Report neşiri habar berýär.
“Adaty gurnama hatarlarynyň deregine biz robotlar toparyny ulanýarys. Bu uçýan enjamlary we uly aerokosmos gurluşlaryny has çalt, az çykdajy we has ýokary takyklyk bilen ýygnamaga mümkinçilik berýän öňegidişlik” – diýip, kompaniýanyň esaslandyryjysy Rinaldo Brutoko aýtdy.
Onuň sözlerine görä, täze çemeleşme hili ýokarlandyrmak bilen birlikde umumy çykdajylary 40%-den gowrak, önümçilik möhletini bolsa 60% azaldyp biler.
Robotlar awtonom işläp, biri-biri bilen özara hereket eder. Olar karkasy ýygnamakdan başlap, içerki komponentleri gurnamaga çenli işleri ýerine ýetirýär. Ulgam emeli aňyň kömegi bilen dolandyrylýar. Howpsuzlyga içerki datçikler jogap berýär. Uly bölekler bilen işlemek üçin agyr robotlar ulanylýar.
Tehnologiýa yklymara gatnawlar üçin Pipeline-in-the-Sky wodorod dirižabllaryny döretmek boýunça taslamanyň çäklerinde işlenip taýýarlandy. Bu enjamlar gazylyp alynýan ýangyjy ulanmaýar we täjirçilik hem ynsanperwer maksatlar üçin ulanylyp bilner.
