Geljek 3-5 ýylyň içinde Russiýanyň dükanlarynyň tekjelerinde mör-möjeklerden alnan belokly batonjyklar, ýogurtlar, hatda çörek hem peýda bolar. Bu barada Sankt-Peterburgyň Dolandyryş we azyk tehnologiýalary institutynyň rektory Olga Ponomarýowa belleýär diýip, TASS habar berýär.
Hünärmeniň sözlerine görä, munuň üçin medeni päsgelçilikleri ýeňip geçmek we gaýtadan işlemegiň howpsuz usullaryny işläp taýýarlamak gerek.
"Häzirki wagtda dünýä ýurtlary azyk önümçiligi üçin adaty bolmadyk belok çeşmelerini gözleýärler, şol sanda iýmit taýýarlamakda mör-möjekleri ýa-da mör-möjek önümlerini ulanmagyň mümkinçiliklerini öwrenýärler. Köpçülik üçin önüm öndürilende, şol sanda çörek önümleri taýýarlananda mör-möjekleriň ulanylmagy biziň ýurdumyzda entek başlangyç tapgyrda. Geljek üç-bäş ýylyň dowamynda Russiýada düzüminde entomoprotein – mör-möjeklerden alnan beloklary saklaýan batonjyklar, snekler, ýogurtlar hem-de çörek we çörek önümleri peýda bolup biler " – diýip, Ponomarýowa gürrüň berdi.
Onuň sözlerine görä, belok sarp edijilere bilniksiz goşundylar görnüşinde gaýtadan işlener.
Bilermen mör-möjek ununy üwelen et, kokteýl ýa-da şokolad üçin ulanyp boljakdygyny düşündirdi. Alymlar bu belogyň gymmatynyň ýumurtga, sygyr eti we balyk bilen deňeşdirilýändigini tassyklaýarlar. Şol bir wagtyň özünde, onuň önümçiligine adaty maldarçylykdan has az serişde gidýär.
Ponomarýowa belogyň beden üçin esasy gurluşyk materialydygyny aýtdy.
Şeýle-de bolsa, Russiýada degişli kanunlaryň ýoklugy sebäpli, pudagy ösdürmekden henizem saklanylýar. Mör-möjekler hasaba alynmagyny we howpsuzlygynyň barlanylmagyny talap edýän täze iýmit önümi hasaplanýar.
Hünärmen dünýäde 2 milliard adamyň eýýäm öz iýmitinde mör-möjekleri ulanyp ýörendigine ünsi çekýär. Bu Aziýanyň, Afrikanyň we Günorta Amerikanyň köp ýurtlarynda medeniýetiň bir bölegi. Käbir Günbatar ýurtlarynda hem olaryň ulanylmagyna rugsat berilýär.
Tehnologiýasy işlenip taýýarlansa we tagamy gowulaşdyrylsa, bu belok iýmite girizilip bilner diýip, Ponomarýowa sözüni jemledi.
