Demirgazyk-Günbatar uniwersitetiniň (ABŞ) inženerleri hirurgiki usulda aýrylmagyny talap etmeýän kindiwanja kardiostimulýatory döretdiler. Ol bedende doly eräp gidýär.
Enjamyň ölçegleri bary-ýogy ini 1,8mm, uzynlygy 3,5 mm we galyňlygy 1mm. Ol şprisiň uçjagazyna ýerleşdirilýär we inwaziw däl görnüşde goýberilýär. Kardiostimulýator ýüregi wagtlaýyn goldamak üçin niýetlenendir, esasanam täze doglan dogabitdi ýürek ýetmezçilikli çagalaryň ýüregi operasiýadan soňky ilkinji günlerde möhüm goldawy talap edýär.
Kardiostimulýatoryň möhüm aýratynlygy elektrik üpjünçiliginiň we dolandyryş ulgamlarynyň esasy gurluşyň daşynda ýerleşmegidir, bu bolsa enjamyň agramyny ep-esli azaldýar. Güýç oturdylan galwaniki elementden gelýär: biosuwuklyklaryň barlygynda hereket edýän iki dürli metal, ýüregi herekete getirmek üçin elektrik toguny döredýän kiçi batareýany emele getirýär.
Kiçijik enjam infragyzyl ýagtylyk bilen işjeňleşdirilýär. Döşe berkidilýän goşmaça dakylýan enjam ýürek urgusyna gözegçilik edýär. Ýürek urgusy kadadan pes bolsa, datçikleri enjamy işe girizýän swetodiody ýakýar. Bu sime bolan zerurlygy aradan aýyrýar.
"Biz ýagtylyk arkaly dolandyryş zynjyryny döretdik, bu bolsa enjamyň ölçegini ep-esli kiçeltmäge mümkinçilik berdi" -diýip, professor Jon A. Rojers gürrüň berdi.
Birnäçe gün işländen soň enjam ganda doly eräp gidýär, bu bolsa hassany gaýtadan operasiýa bolmakdan halas edýär.
"Biziň esasy maksadymyz çagalara kömek etmekdir. Körpeje hassalaryň köpüsi üçin wagtlaýyn gyjyndyrma möhümdir we biziň kindiwanja enjamymyz goşmaça töwekgelçiliksiz zerur goldawy berýär "- diýip, ýürek lukmany Igor Ýefimow belledi.
Täze enjam ýürek keselini, nerwleri we süňkleri bejermekde, ýaralary bitirmekde we agyrylary aýyrmakda mundan beýläk ulanmak üçin giň mümkinçilikleri açýar.
