Parlamentara Bileleşigiň 150-nji ýubileý assambleýasynyň çäklerinde Türkmenistanyň Mejlisiniň Başlygy D.Gulmanowa Özbegistanyň Oliý Majlisiniň Kanun çykaryjy palatasynyň hem-de Senatynyň ýolbaşçylary bilen duşuşyklary geçirdi.
Türkmenistanyň Parlamentiniň metbugat gullugynyň habar bermegine görä, Özbegistanyň Oliý Majlisiniň Kanun çykaryjy palatasynyň Başlygy N.Ismoilow bilen duşuşykda Türkmenistanyň başlangyjy bilen, BMG-niň Baş Assambleýasynyň «2025-nji ýyl – Halkara parahatçylyk we ynanyşmak ýyly», «Türkmenistanyň hemişelik Bitaraplygy» atly Kararnamalarynyň kabul edilmeginiň ähmiýeti nygtaldy hem-de Özbegistan Respublikasynyň bu teklipleri goldandyklary we awtordaş bolup çykyş edendikleri üçin türkmen tarapy hoşallyk sözlerini beýan etdi hem-de Özbegistanyň Parlament wekiliýetini 2025-nji Halkara parahatçylyk we ynanyşmak ýylynda bellenilýän Türkmenistanyň hemişelik Bitaraplygynyň 30 ýyllygy mynasybetli geçiriljek halkara çärelerine gatnaşmaga çagyryldy.
Özbegistanyň Oliý Majlisiniň Senatynyň Başlygy T.Narbaýewa bilen duşuşykda iki ýurduň arasynda ýola goýlan dostlukly gatnaşyklaryň, söwda-ykdysady, medeni-ynsanperwer ugurlardaky hyzmatdaşlygyň netijeli dowam etdirilmeginde parlamentara gatnaşyklaryň ähmiýeti nygtalyp geçildi. Şunuň bilen baglylykda, taraplar geljekde bu ugurda alnyp barylýan işleri has-da kämilleşdirmegi goldadylar.
Duşuşygyň ahyrynda taraplar geljekde döwletara gatnaşyklary parlament diplomatiýasynyň üsti bilen goldamakda tagallalary birleşdirmegiň möhümdigini bellediler.
