Meta täze nesil Llama 4 emeli aň modellerini hödürledi. Bu modeller bir wagtda teksti, suraty we wideony işläp bilýär. Esasy iki model, ýagny Llama 4 Scout we Maverick eýýäm llama.com web sahypasynda hem-de Hugging Face-de elýeterli, ýakyn günlerde bolsa WhatsApp, Messenger we Instagram ýaly Meta hyzmatlarynda hem elýeterli bolar diýip, «Bloomberg» neşiri habar berýär.
Bu modelleriň öňkülerden tapawudy – tekst bilen suraty aýratyn däl-de, şol bir wagtda işläp, öwrenip bilýär. Bu adamlaryň maglumatlary öwreniş usulyna meňzeýär.
Llama 4 Scout (109 mlrd parametrden 17 mlrd işjeň) bir gezekde 48 suraty seljerip bilýär we diňe bir Nvidia H100 wideokartasynda işleýär. Şonuň üçin ol Google Gemma 3-den hem örän çalt. Şeýle hem bu model 10 mln tokenlik konteksti işläp bilýär – bu 20 sagatlyk wideo ýa-da 5000 sahypalyk tekst diýmegi aňladýar.
Llama 4 Maverick (400 mlrd parametrden 17 mlrd işjeň) 2 trln parametrli uly modeliň serwerler üçin ýöriteleşdirilen ýeňil görnüşidir. Bu model hem 10 mln tokenlik konteksti işläp bilýär. Ol logiki meseleleri çözüp, kod ýazyp bilýär. GPT-4.5-iň derejesinde netijeleri hödürleýär. Uly serwerlerde ýokary netijelilik bilen işleýär.
Iki model hem 30 trln token bilen türgenleşdirilen we 200 dili öz içine alýar. Şol dilleriň 100-si üçin, hersi boýunça azyndan 1 mlrd mysal toplandy.
Howpsuzlyk üçin Llama Guard we Prompt Guard ýaly gorag ulgamlary girizildi. Çekişmeli temalara jogap bermekdäki ret ediş derejesi 7%-den 2%-e düşürildi.
Şeýle-de Meta 29-njy aprelde täze logiki pikirleniş ukyby bolan emeli aň modelini tanyşdyrjakdygyny aýtdy. Llama 4 arkaly ozal diňe uly serwerlerde ýerine ýetirmesi mümkin bolan işler, indi kiçi ulgamlarda hem amala aşyrylyp bilner.
