ABŞ-nyň Prezidenti Donald Tramp 3-nji aprelden başlap, ýeňil awtoulaglaryň, ýük awtoulaglarynyň we awtoşaýlaryň importyna 25% gümrük paçlaryny girizmek hakynda buýruga gol çekdi. Bu barada ol Ak tamyň Gül bagynda eden çykyşynda mälim etdi diýip, «Kommersant» neşiri habar berýär.
Bu wakanyň öňüsyrasynda iri awtoulag öndürijileri ýylyň birinji çärýeginiň jemleri boýunça ABŞ-da satuwlaryň ep-esli artandygyny habar berdiler. Has uly ösüş mart aýynda bellige alyndy.
Şeýlelikde, General Motors-yň satuwy geçen ýylyň degişli döwri bilen deňeşdirilende 17%, Hyundai-nyňky 10%, Kia-nyňky 11%, Lexus-yňky 14%, Honda we Ford-yňky bolsa 5% ýokarlandy.
«JD Power-iň» bilermenleri bu ösüşiň sebäbini amerikaly alyjylaryň täze gümrük paçlary güýje girmezden ozal awtoulag satyn almak islegi bilen düşündirýärler. Çünki täze paçlar awtoulaglaryň bölekleýin satuw bahalarynyň ýokarlanmagyna getirip biler diýip, «CNBC» habar berýär.
«Bloomberg» neşiriniň bellemegine görä, ýylyň birinji çärýegi ABŞ-nyň awtoulag bazary üçin beýleki çärýeklere garanyňda «adaty» boljak iň soňky döwür bolup biler. Sebäbi ýurduň içerki bazaryndaky awtoulaglaryň, takmynan, ýarysy import edilýär. Şeýle-de awtoulaglar ABŞ-da öndürilse-de, olaryň köp sanly komponentleri daşary ýurtlardan getirilýär. Şol sebäpden bu şaýlar hem ýokarlandyrylan gümrük paçlaryna sezewar bolup bilerler.
