Prezident Serdar Berdimuhamedow Mýanma Bileleşigi Respublikasynyň Döwlet dolandyryş Geňeşiniň Başlygy, Premýer-ministri Min Aun Hlaýgna ýurduň merkezi sebitinde bolup geçen, köp sanly adam pidalaryna we şikes ýetmelere getiren ýertitreme zerarly gynanç hatyny iberdi.
Döwlet Baştutany şu agyr pursatda gurban bolanlaryň maşgalalaryna, dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan çuňňur gynanjyny we medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi.
Mýanmada 28-nji martda, anna güni 7,7 we 6,4 magnitudaly ýertitreme bolup geçdi. Geçen günlerde pidalaryň sany 1700 adama ýetdi, 3400 adam şikes aldy. Ýurduň harby administrasiýasy heniz 300 adamyň dereksiz ýiten hasaplanýandygyny habar berdi.
Yranmalar hatda Hytaýda we Tailandda hem hasaba alyndy. Tailandyň hökümetiniň habar bermegine görä, Bangkokda 17 adam ýertitremäniň pidasy boldy, 32 adam şikes aldy, 82 adam dereksiz ýiten hasaplanylýar. Halas ediş işleri dowam edýär.
