Tesla Saud Arabystanynda resmi taýdan satuwa başlamak üçin taýynlyk görýär. Açylyş çäresi 2025-nji ýylyň 10-njy aprelinde Er-Riýad şäherinde Bujairi Terrace meýdançasynda geçiriler diýip, kompaniýanyň web sahypasyndaky maglumatlara salgylanyp, «Reuters» agentligi habar berýär.
Çärä gelen myhmanlara Tesla elektromobilleri, öýde zarýad beriş tehnologiýalary, awtonom dolandyryş ulgamy we Gün energiýasy bilen baglanyşykly tehnologiýalar görkeziler.
Şeýle-de kompaniýa Optimus atly gumanoid (adam şekilli) robotyny we sürüjisiz taksi ulgamy bolan Cybercab-y hödürlär. Myhmanlar Tesla-nyň hünärmenleri bilen duşuşyp, ulaglary ýurtda nädip satyn alyp bolýandygyny we ulanmalydygyny öwrenip bilerler.
Tesla-nyň Saud Arabystanynyň bazaryna girmegi ýerli ilatyň arasynda oňyn garşy alyndy. Köp adam brendiň patyşalyga gelmegine uzak wagtdan bäri garaşýardy. Ilon Maskyň brendiniň elektromobilleri köpden bäri Ýakyn Gündogaryň käbir ýurtlarynda satylýar, emma ol häzire çenli Pars aýlagynyň iň uly bazary bolan Saud Arabystanynda resmi ýagdaýda elýeterli däldi.
Tesla Ýewropada elektromobilleriniň satuwynyň peselmegi bilen ýüzbe-ýüz boldy. Şeýle-de kompaniýanyň baş direktory Ilon Maskyň ABŞ-nyň prezidenti Donald Trampyň geňeşçisi wezipesine geçeninden we Hökümet netijeliliginiň departamentiniň ýolbaşçysy wezipesine (DOGE) bellenilenden soň, ABŞ-da giň gerimli protest (närazylyk bildirmek) tolkunlary döredi. Mask bellenen wezipesinde federal hökümetiň işgärleriniň sanyny azaltmak syýasatyny amala aşyrdy.
Yklymda elektromobilleriň umumy hasaba alnyşy artan hem bolsa, Tesla-nyň satuwy we bazardaky paýy şu ýyl Ýewropada pese gaçdy. Ýewropanyň awtoulag öndürijiler assosiasiýasynyň (ACEA) maglumatlaryna görä, şu ýylyň başyndan bäri, Maskyň brendiniň Ýewropadaky satuwy 42,6% pese düşdi.
