Rus syýahatçysy Fýodor Konýuhow kürekli gaýykda özbaşdak Hindi ummanyndan syýahatyny dowam edýär. Täzelikde onuň gaýygyndaky elektrik bilen işleýän suwy süýjediji (agyz suwuna öwrüji) enjamy hatardan çykdy. Indi ol el bilen işledilýän ýörite enjamda süýjütmeli bolýar. Bu barada ekspedisiýanyň ştabynyň Telegram kanalynda habar berildi.
Konýuhow Günorta Amerikadan Awstraliýa tarap ýüzýär. Ol eýýäm 111 gün bäri suwda syýahat edýär.
Duzly suwy agyz suwuna öwürýän enjamyň döwülmegine çyglylyk, kondensat we deňiz suwy sebäp boldy. Olar enjamyň kontaktlaryny we birikdirijilerini köneltdi. Aslynda, bu enjam bu hili şertler üçin niýetlenilmändi – ol gury we gowy ýelejiredilýän ýerde işledilmelidi.
«Gaýykda gury ýer ýok – Fýodoryň aýtmagyna görä, özüňi hemişe çygly gowakda ýaly duýýarsyň. Kondensat üçekden we diwarlardan syrygyp akýar, gaýyk agdarylansoň, deňziň suwy (gaýygyň düýbünde hemişe az mukdarda bolýar) ähli korpus boýunça ýaýraýar, hatda nawigasiýa enjamlaryna, aragatnaşyk enjamlaryna we suw süýjedijä-de girýär» — diýip, ekspedisiýanyň ştaby maglumat berýär.
Indi Konýuhow ilkinji gezek el bilen işledilýän «Survivor» suw duzsuzlandyryjysyny ulanýar. 1 litr suw almak üçin, oňa 550 gezek basmak zerur.
«Onuň adynyň özi – Survivor (diri galan) – köp zady aýdýar, eger-de siz bu enjamy ulanýan bolsaňyz, diýmek ýagdaýyňyz o diýen öwerlik däl» — diýip, Konýuhowyň ştaby belleýär.
Syýahatçy her 2-3 gün üçin, 3-4 litr süýji suw toplamagy meýilleşdirýär.
Awstraliýa çenli entek 5,3 müň kilometr ýol bar. Häzirlikçe onuň 30 litr süýji suwy bar. Bu bolsa her gün üçin, 1 litr ätiýaçlyk suw diýmegi aňladýar.
Mundan ozal Konýuhow we uçarman Igor Potapkin ilkinji gezek Arktikanyň üstünden motoparaplan bilen uçup geçipdiler. 440,51 kilometrlik uçuş 10 sagat 13 minut dowam edipdi. Uçuş 267-835 metr beýiklikde amala aşyrylypdy. Ortaça tizlik bolsa sagatda 47 kilometr bolupdy.
