“Ýetginjeklik döwri” (Переходный возраст) mini-serialy Netflix-de iki hepdede tomaşa sany boýunça rekord goýdy. Variety neşiriniň habar bermegine görä, seriala 66,3 mln gezek tomaşa edildi.
Soňky hepdede serial 42 mln tomaşa ýygnady. Ol relizinden soňky 11-nji günde mini-seriallaryň arasynda rekord goýdy diýip, Deadline belleýär.
Häzir “Ýetginjeklik döwri” Netflix-iň iň meşhur seriallarynyň onlugyna girip biler. Onunjy orny 91 günde 93,8 mln tomaşa bilen “Brijertonlaryň” ikinji möwsümi eýeleýär. Filip Barantininiň serialyna “Brijertonlaryň” yzyndan ýetmek üçin 27,5 mln tomaşa ýygnamak galdy.
“Ýetginjeklik döwri” synpdaşynyň ölümi üçin tussag edilýän mekdep okuwçysy barada gürrüň berýär. Serial jenaýata getiren psihologik we sosial ýagdaýlary derňeýär, ýetginjekleriň arasynda aýal-gyzlara bolan ýigrenç, sosial ulgamlaryň täsiri we terbiýe meseleleri ýaly mowzuklara degip geçýär.
Ssenariçi Jek Torn çagalara sosial ulgamy ulanmagy gadagan etmelidigini belleýär. Ol internetde “hakyky erkegiň” nähili bolmalydygy barada ýaýraýan zyýanly düşünjeleriň derejesi bilen baglylykda alada bildirdi.
