Sosial ulgamlarda Liqi hökmünde tanalýan 31 ýaşly hytaýly adam Hubeý welaýatyndaky Szinçžou şäherinden Tibetdäki Lhasa çenli pyýada syýahatyny tamamlady. Ol 3300 km ýoly söküp, dürli kynçylyklary başdan geçirdi. Haçan-da öýüne dolanyp gelende, hemmeleri özüniň daşky keşbi bilen haýran galdyrdy diýip, Jiupai News ýazýar.
Liqi öz syýahatyna geçen ýylyň 6-njy aprelinde başlady we 11-nji martda bellenen nokada ýetdi. Ol zerur zatlary bilen iki tigirli arabany özi bilen çekip, pyýada ýöredi. Onuň ýoly beýik dag gerişlerinden geçýärdi. Ol öz ýolunda taýfuny, güýçli tupanlary we yzygiderli garyň ýagmagyny başdan geçirdi. Iki gezek ýabany möjeklere duş geldi. Bir gezek bolsa onuň arabasy suwly ganawa gaçdy we onuň tigirleri döwüldi. Netijede, ol ýoluny süýräp dowam etdirmeli boldy.
Öýe gelenden soň, Liqi öz ýakynlaryny haýran galdyrdy, ony hiç kim tanamady. Sosial ulgamlary ulanyjylar ýowuz howa şertleriniň, fiziki ýadawlygyň we esasy arassaçylyk serişdeleriniň uzak wagtlap bolmazlygynyň ony 10-20 ýyl garradandygyny belledi.
Kynçylyklara garamazdan, Liqi-niň wakasy köpleri ruhlandyrdy. Internet auditoriýasy onuň edermenligini ruhy güýjüň we arzuwa wepalylygyň nyşany diýip atlandyrdy.
