Türkmenistanyň Oguz han adyndaky Inžener-tehnologiýalar uniwersitetiniň talyby Gowşut Akmyradow CloudFest 2025 halkara bäsleşiginiň ýeňijileriniň hataryna girdi. Çäre 17–20-nji mart aralygynda Germaniýanyň Rust şäherinde geçirilen serginiň çäklerinde boldy. Bu barada "Türkmenistan: Altyn asyr" elektron neşiri habar berýär.
Gowşut «Bank plastik kartlary arkaly pul geçirilişini amala aşyrýan «Sanly_birlik» kömekçi programma üpjünçiliginiň mümkinçilikleri» atly ylmy işini hödürledi. Eminler taslamany ýokary bahalandyryp, ony «Innowasion maliýeler we elektron hasabatlylyk» ugrunda ýeňiji diýip yglan etdiler. Bäsleşigiň guramaçylary oňa diplom we ýadygärlik sowgat gowşurdylar.
Gowşut Akmyradow kiberfiziki ulgamlar fakultetiniň 4-nji ýyl talyby.
CloudFest 2025 innowasion tehnologiýalar ugurly abraýly ýaşlar bäsleşikleriniň biri hasaplanýar. Şu ýyl ol dünýäniň 34 ýurdunyň zehinli ýaşlaryny özünde jemledi.
Bäsleşik bäş ugur - emeli aň, robototehnika we kibernetika, bulut tehnologiýalary, innowasion maliýeler we elektron hasabatlylyk, tor we internet howpsuzlygy boýunça geçirildi.
