Germaniýanyň Rips obasynda dynç almak üçin özboluşly jaý peýda boldy. Onuň meýdany bary-ýogy 11 inedördül metre barabar diýip, BILD habar berýär.
Jaýyň eýeleri Marita Hannemann-Moos we Andreas Moos köne transformator podstansiýasyny 1,19 ýewro satyn aldy. Desgany üýtgetmek işleri 140 000 ýewro düşdi we pandemiýa hem býurokratiýa sebäpli dört ýyla çekdi. Indi onuň içinde zerur zatlaryň ählisi bar: aşhana, ýatylýan otag, myhman otagy we hatda kiçijik gyş bagy.
Birinji gatda duşly, ýyly wanna otagy, ikinji gatda bolsa açylýan diwan bilen aşhana – myhman otagy bar. Goşlar üçin üçegiň aşagynda ýer bolup, ol ýere ýygnalýan basgançak bilen çykylýar. Ululygyna garamazdan, jaý otel ýaly rahatdyr.
Indi ol gününe 110 ýewro bilen kärendesine berilýär. Är-aýal taslamanyň dünýäde iň kiçijik jaý hökmünde ykrar edilmegine umyt bildirýär.
“Häzirlikçe iň kiçi hasaba alnan jaý Bad-Zegebergde ýerleşýär, ýöne onuň meýdany biziňkiden sekiz inedördül metr uly. Biziň ähli mümkinçiligimiz bar diýip pikir edýäris” – diýip, Andreas Moos belleýär.
