«Schmidt Ocean Institute» (SOI) täjirçilik däl gaznasynyň bilermenleri Antarktidanyň golaýynda, Günorta ummanynyň düýbünde äpet deňiz möýüni wideo düşürmegi başardylar diýip, «The Independent» neşiri habar berýär. Deňiz möýi buz bilen örtülen Günorta Sandwiç adalarynyň aşagynda, 2 kilometr çuňlukda gezip ýören eken.
Deňiz möýleri – guryýerdäki möýleriň daşgyn garyndaşlarydyr. Olaryň käbiriniň aýaklarynyň uzynlygy 50 santimetre çenli ýetýär. Emma polýar sebitlerde olar has-da uly bolýarlar. Alymlar munuň sebäbini «çuň deňiz äpetligi» diýilýän fenomen bilen baglanyşdyrýarlar.
Bu jandarlaryň şeýle äpet bolmagynyň başga-da birnäçe sebäbi bar. Ilki bilen pes temperaturanyň we ýokary basyşyň täsiri bilen olaryň metabolizmi haýallaýar. Şonuň üçin hem olar uzak ýaşap, ulalyp bilýärler. Ikinjidenem deňziň suwy olaryň bedenine goldaw berýär. Olar ulaldykça agramlary artýar, ýöne suwda erkin hereket edýändikleri üçin, öz agramlarynyň astynda heläk bolmaýarlar.
Bu jandarlaryň, takmynan, 1500 görnüşi bar. Deňiz möýleri «Pantopoda» otrýadyna degişlidir. Bu söz «ähli aýak» diýen manyny berýär. Deňiz möýleriniň aýaklaryndan başga agzalary hem bar, emma öýkenleri ýok – olar ekzoskeletleriniň (daşky skeletleriniň) üsti bilen dem alýarlar. Deňiz möýleri adam üçin howply däldir, olar çakmaýar. Emma hortumlaryny meduzalaryň we aktiniýalaryň (deňiz anemonlarynyň) bedenine sanjyp, olaryň içki agzalaryny sorup iýýärler.
