ABŞ-nyň söwda ministri Goward Lýutnik baý maýadarlara bir günde müň sany «altyn kart» satandygyny aýtdy. Bu kart daşary ýurtlulara ABŞ-da hemişelik ýaşamaga hukuk berýär. Ministr bu maglumatlary «All-In» atly podkastdaky interwýusynda mälim etdi.
«Ýeri gelende aýtsam, düýn müň sany [„altyn kart“] satdym» — diýip, Lýutnik 21-nji martda neşir edilen podkastda aýtdy. Emma interwýunyň haýsy günde ýazga alnandygy barada maglumat berilmedi.
Lýutnik dünýäde ABŞ-nyň «altyn kartyny» satyn alyp biljek 37 million adamyň bardygyny aýdýar. Onuň sözlerine görä, ABŞ-nyň hökümeti berlen «altyn karty» diňe eýesi «adatdan daşary eýmenç bir zat» eden ýagdaýynda yzyna alyp biler.
ABŞ-nyň prezidenti Donald Tramp 25-nji fewraldaky çykyşynda «altyn kart» maksatnamasynyň mart aýynda işe giriziljekdigini aýdypdy. Bu kartyň eýelerine ABŞ-da hemişelik ýaşamaga hukuk berilýär. Şeýle-de olar geljekde ABŞ-nyň raýatlygyna ýüz tutmaga mümkinçilik gazanýarlar. Trampyň sözlerine görä, bir «altyn kartyň» bahasy, takmynan, 5 million dollar bolar. Trampyň pikirine görä, ABŞ şeýle kartlaryň million sanysyny satyp biler.
«The Guardian» neşiriniň belläp geçmegine görä, bahasy örän ýokary bolsa-da, bu maksatnama baý adamlaryň arasynda meşhur bolar. Emma neşir belli bir mesele barada hem duýduryş berdi: ABŞ-nyň salgyt ulgamy bu karty satyn alan adamlara kynçylyk döredip biler. Sebäbi ABŞ-nyň salgyt kanunçylygy raýatlary daşary ýurt döwletlerinde gazanýan girdejileri boýunça hem salgyt tölemäge borçlandyrýar.
