«Baýkalyň buzunyň astynda 2025» atly fridaýwing festiwalynda russiýaly Ýekaterina Nekrasowa uly üstünlik gazandy. Ol gidrokostýum geýmezden, Baýkal kölünde, buzuň astynda 122 metr aralyga ýüzdi. Bu netije bilen ol dünýä rekordyny goýdy. Bu baradaky habary Irkutsk oblastynyň gubernatory Igor Kobzew Telegram kanalynyň üsti bilen mälim etdi.
«Baýkalda ýene bir rekord – russiýaly Ýekaterina Nekrasowa gidrokostýumsyz, diňe lastlar bilen buzuň astynda 122 metr ýüzdi. Bu absolýut dünýä rekordydyr. Ýekaterinany gutlaýaryn!» — diýip, jenap Kobzew ýazdy.
Bu festiwal Irkutsk oblastynyň Listwýanka obasynda geçirilýär. Oňa dürli ýurtlardan türgenler gatnaşýarlar. Şu ýyl Russiýadan, Horwatiýadan we Türkiýeden jemi 20 türgen gatnaşdy.
Bu festiwalda öň hem üç sany dünýä rekordy goýlupdy. Russiýaly türgen Olga Markina monolast bilen 71 metr çümmegi başardy. Ol 2021-nji ýylda goýan öz rekordyny täzeledi. Ozal onuň rekordy 63,8 metrdi. Horwatiýaly Sanda Deliýa bolsa lastsyz, diňe ýüp arkaly 55 metr çümüp, geçen ýylky 40 metrlik rekordyny täzeledi. Bu ugurda bolsa başga bir horwatiýaly türgen Witomir Mariçiç has ýokary netijäni görkezdi. Ol 62 metr çümüp, Sanda Deliýanyň rekordyny geçmegi başardy.
