Tesla ABŞ-da daşarky paneli bilen bagly meseläni çözmek üçin 46 096 sany elektrikli Cybertruck pikaplaryny yzyna çagyrýar. Ulag hereketde wagty ol üzülip gaçyp biler diýip, CNBC ýazýar.
Milli ýol hereketiniň howpsuzlygy dolandyryş gullugynyň (NHTSA) beren habaryna görä, mesele öň aýnanyň düýbünden yzky gapylara çenli gidýän polat bezegde. Bu bölekler ýelim bilen berkidilen bolup, görnüşi ýaly, ýeterlik derejede pugta däl bolup çykdy.
Teslanyň hyzmat bölümi daşky gurşawyň täsiri astynda könelmedik has oňat hilli ýelim ulanyp, kemçiligi mugt düzetmegi wada berdi. Mundan başga-da, panel kuzowa kebşirlenen hyrly çüýler we nurbatlar arkaly berkidiler.
Kompaniýa Cybertruck-yň satuwy baradaky görkezijileri aýtmasa-da, seljerijiler satylan pikaplaryň köpüsiniň yzyna çagyrylmaga degişli boljakdygyny çaklaýarlar.
Pikap üçin häzirki çagyryş 2024-nji ýylyň ýanwaryndan bäri sekizinji çagyryşdyr. Bu kompaniýa şowsuzlyk getirip biler, sebäbi elektropikapyň üstünligi ýokary bäsdeşlik we model hatarynyň könelmegi şertlerinde onuň ösüşiniň kepilligi hökmünde görülýärdi. Mundan başga-da, ýokary karz çykdajylary bilen ýüzbe-ýüz bolýan sarp edijiler has arzan gibridleri satyn almagy makul bilýärler.
Cybertruck-a bolan isleg birnäçe gijikmeden soň, geçen ýylyň ahyrynda gowşamagyň alamatlaryny görkezipdi.
ABŞ-da yzyna çagyrylýan ulaglaryň ep-esli bölegi milliarder Ilon Maskyň ýolbaşçylygyndaky kompaniýanyň paýyna düşýär. BizzyCar-yň berýän maglumatlaryna görä, Tesla geçen ýyl jemi 5,1 million ulagy yzyna çagyrdy. Şeýle-de bolsa, ýüze çykarylan meseleleriň köpüsi aglaba programma üpjünçiliginiň täzelenmeleri arkaly çözüldi.
