Twitter-iň nyşany bolan äpet gök guşjagaz auksiona çykaryldy. 2022-nji ýylda sosial tory satyn alyp, ony X-a öwren Ilon Mask köne nyşandan dynmak isleýär. Onuň agramy 254 kg-a golaýdyr.
Meşhur gök guşjagaz ozal kompaniýanyň San-Fransiskodaky baş edarasynda ýerleşýärdi. Onuň ölçegleri 368 × 267 sm-e deň.
«RR Auction» auksion öýi nyşanyň bahasynyň 40 müň dollara ýetjekdigini çaklaýar, emma häzirki wagta çenli berlen iň ýokary teklip 21 müň 664 dollar boldy.
Alyjy üçin esasy kynçylyk diňe ony satyn almak däl, eýsem ol ony San-Fransiskodaky ammardan daşamaly hem bolar. Bu nyşany sökmek üçin, ozal ýörite kran we işçi topary gerek bolupdy.
Bu auksiona çykarylan ilkinji «Larri» däl – Twitter-iň nyşany şeýle at bilen hem tanalýar. 2023-nji ýylda hem köne nyşanlaryň käbiri satylypdy. Mysal üçin, ofisdäkileriň iň ulularyndan biri 100 müň dollara satylypdy. Şeýle-de baş edaradan başga bir äpet logotip hem satylypdy, emma onuň bahasy aýan edilmändi.
