Hytaýda uçarmansyz TP1000 uly ýük uçarynyň ilkinji synag uçuşy geçirildi. Ony Yitong UAV Systems kompaniýasy işläp taýýarlady diýip, CGTN habar berýär.
Uçarmansyz uçar bir tonna çenli ýüki götermäge we desant düşürmäge ukyply. TP1000-iň uçuş agramy 3,3 tonna. Doly ýükli ýagdaýda iň ýokary uçuş aralygy 1000 kilometre deňdir. Ýük bölüminiň göwrümi ýedi kub metre ýetýär.
Uçuş 26 minut dowam etdi. Apparatyň ähli ulgamlary durnukly işledi. Işläp düzüjileriň habar bermeklerine görä, öndürijilik görkezijileri garaşylýanlara doly laýyk geldi.
Synaglaryň dowamynda dron çydamlydygyny, oňat öwrüm edip bilýändigini we ähli ulgamlarynyň ygtybarlydygyny görkezdi.
TP1000-iň 2026-njy ýyla çenli ulanyşa girmegine garaşylýar. Taslama Hytaýyň uçarmansyz howa ulaglaryny ösdürmekdäki täze ädimi bolar, şeýle hem logistika we adatdan daşary ýagdaýlardaky mümkinçiliklerini güýçlendirer.
